الحلقة الأولى من مراحل النضال في الألمانية

النضال بـالجامعة الألمانية في القاهرة يستحق المشاهدة والتدقيق ومحاولة الفهم فقد شهدنا في مدة قصيرة جدا وعي يتشكل ونظريات تتحقق, معا في هذه التدوينة ندقق في كل موجة من موجات التظاهر في الألمانية حتى نتمكن من تحليل ماحدث منذ بدايته

أولا مظاهرات غزة في 2009

دعى لها الطلاب النشطاء في الجامعة بالأخص طلاب التيار الاسلامي و بدأت بلم تبرعات ثم مظاهرة و كان الاقبال جيد جدا إذا نظرنا للظروف في ذلك الوقت.

 ثانيا مارس 2011 

عاد الطلاب من الثمانية عشر يوما الأجمل في تاريخ مصر محملين بالأمل ومتخيلين انهم ابادوا النظام فقرروا ان يثوروا ليطلبوا كل حقوقهم دون استثناء بدأوا التظاهر ورفعوا أكثر من 52 مطلب وكانت هذه الموجة غير منظمة بالمرة, تحدث عشرات الطلاب مع الادارة عن انهم ممثلي الطلاب وكانت المطالب تختلف وفيها الغير واقعي والغير منطقي ولكن أختزلت كل المطالب حينها في مطلب واحد فقط وهو تأسيس اتحاد طلاب قوي وهو قادر بعد ذلك على حل كل المشاكل الأخرى بدأ الطلاب حينها اعتصام لمدة يوم واحد وبعدها قاموا بفض هذا الاعتصام بناء على أساس ماقدم لهم من وعود وهنا كانت الصدمة الكبرى لطلاب الألمانية نعم لم يسقط النظام القمعي بل لم يبدأ بالسقوط فقد قامت ادارة الجامعة بفصل 16 طالبا من المعتصمين لحين حضوراولياء أمورهم قامت المظاهرات مرة أخرى وانتهت الموجة برضوخ ادارة الجامعة عن طريق اعادة المفصولين وإنشاء اتحاد طلاب بلائحة مبدئية(نفس لائحة 79) على أن يقوم أول اتحاد منتخب بوضع اللائحة الجديدة التي تسري بعد ذلك.

ثالثا نوفمبر ديسمبر 2011

 استمرت الجامعة في ركود طويل لم يكن فيه أي احداث بل جاء مجلس الاتحاد الاول إصلاحيا لأقصى الحدود مع قليلا من المناوشات من جانب حركة ثوار الجامعة الألمانية مع الادارة استمر الركود حتى تم اعداد مقترح اللائحة الجديدة والذي اصرت ادارة الجامعة في وقتها على التدخل في هيكله ومضمونه بل أكدت على تأجيل وضع اللائحة  للعام القادم.

بدأت هذه الموجة بعد دعوة ادارة الجامعة لانتخابات على اللائحة القديمة باجتماع بين مجلس الاتحاد وممثلين من كل الأسر و الحركات السياسية بالجامعة وشكلوا كيان تحت اسم #GUCStrike وتمت اعادة هيكلة مجلس الاتحاد لشكل أكثر ثورية فأصبح رئيس ونائب الرئيس من ثوار الجامعة الألمانية وبدأ الكيان في العمل بقوة بعد ان قام بتجهيز عريضة تحمل أرْبع مطالب وهم الآتي:

•  تأجيل الانتخابات 
• استفتاء الطلاب على اللائحة الجديدة>>> انتخابات على اساسها
• نشر لوائح الجامعة الداخلية على موقع الجامعة الرسمي
• وجود الية لتوثيق كل المعاملات بين الطلاب وموظفي الجامعة

 تم تقديم هذه العريضة للجامعة ووضعت ميعاد نهائي للرد 14 نوفمبر وقامت الدعوة للتظاهر في هذا اليوم وجاءت المفاجأة الكبرى يوم 3 نوفمبر حين ارسلت الجامعة رسالة تخاطب فيها الطلاب واولياء الأمور اعلنت فيها تأجيل انتخابات اتحاد الطلاب و غلق الجامعة لمدة اسبوع على غرار مبارك في اضرابات المحلة وهددت الادارة في وقتها بفصل الطلاب واستخدام الشرطة والجيش أو مؤسسات الدولة على حد تعبيرهم في وقتها وبدأت سلسلة من تبادل الرسائل بين اتحاد الطلاب والادارة مما اجبر الادارة مرةأخرى على اللجوء لطريقة مبارك الاعتيادية واغلاق حساب اتحاد الطلاب ومنعه من الرد امام الطلاب.

قام الطلاب بوقفة صامتة امام سور الجامعة في يوم 14 نوفمبر للتعبير عن منعهم حتى من الحديث و بدأت في تلك الفترة رسائل التضامن والاحتجاج بالتهافت على الجامعة الألمانية من كل انحاء العالم بل وصل الأمر إن طلاب جامعة برلين في المانيا قاموا بالتظاهر من اجل الألمانية  و ايضا قام أحد اعضاء البرلمان الأوروبي واسمه بول مورفي بارسال رسالة احتجاج شديدة اللهجة لإدارة الجامعة.

أحد الطرائف الجديرة بالذكر في هذه الموجة هو فيديو الملثم مجهول الاصل وهو فيديو أرسلته ادارة الجامعة للطلاب فيه أحد الاشخاص الملثمين وهو يلقي جركن بنزين على الجامعة كَتب عليه#GUCStrike

 انتهت هذه الموجة بسبب قيام احداث محمد محمود وكادت ان تشتعل مرة أخرى في اوائل ديسمبر ولكن دخل مجلس الاتحاد للمرة الأخيرة في مفاوضات لمحاولة توضيح وجهة النظر وانتهت هذه المفاوضات كالعادة بالفشل وانتهت في نفس اليوم الذي اندلع فيه احداث مجلس الوزراء وقامت وقتها ادارة الجامعة بفتح الانتخابات على اللائحةالقديمة الأمر الذي لاقى مقاطعة شديدة من جانب طلاب الجامعة فانتهت هذه الانتخابات بنسب مشاركة لا تتخطى العشرة في المائة مما خلق كيان غير شرعي في محاولة لاستبدال الكيان الشرعي الحقيقي.

ثورة اقتصادية,,, قالت العيش قبل الحرية

لم يحدث ابدا منذ انطلاق الشرارة الأولى للحالة الثورية في العام الماضي في مصر ان هبطت مستويات التفاؤل عند الثوارالمصريين لهذه الدرجة التي وصلوا اليها في الايام القليلة الماضية, فكرنا كثيرا ماالحل ماالخطوة العملية القادمة فـالمسيرات اصبحت شيء مكرر وحتى من يارتادوها هم نفس الأشخاص والاعتصام اصبح تكتيك فاشل (اتهرس في ميت فيلم قبل كده) ووصل الثوار لحالة من الانفصال عن نبض الشارع المصري لدرجة انه حتى العمال المصريين الذين يضربون من اجل حقوقهم اصبح فيهم من يجد الثوار خونة وعملاء على الرغم من انه مدرك تماما ان العدو واحد لكن نجح اعلام النظام الممثل ليس فقط في الاعلام الرسمي للدولة ولكن ايضا في الاعلام الخاص حتى المعارض منه.
فقد اصر هذا الاعلام المعارض على ابراز هذه الثورة على إنها ثورة قامت من اجل الحريات السياسية والديمقراطية وانه يجب على الشعب المصري ان يدفع فاتورة الحرية السياسية من جيبه واكله وأكل أطفاله حتى يعيش حياة ديمقراطية وربما في المستقبل يفتكروه بلقمة وهو مااجده غير صحيح بالمرة فـالثورة المصرية في الاصل قامت من اجل الظروف الاقتصادية فلو نظرنا على الثورة وحاولنا تحليلها منذ اللحظات الأولى لها سنجد عدة شواهد على ذلك :

• اولا من أكثر ماحشد الناس للميدان في الايام الاوائل للثورة هوتقرير صحيفة جارديان الذي قدر ثروة مبارك بسبعين مليار جنيه وإن كان الرقم غير صحيح.
• موجة الاضراب العمالي في الايام الأخيرة للمخلوع كانت هي السبب الأساسي وراء رحيله وليس أي شيء اخر.
• لو فكرت في سؤال أحد في الشارع عن سبب كرهه لمبارك لن تجد من يقل لك ان مبارك يسجن معارضيه أو انه لم ينتخبه ستجد دائما الاجابات حول ضيق الحال و ظروف الاقتصاد وربما بعض الأسباب الانسانية مثل قطر الصعيد وخلافه.
• حبس عبدالناصر كل معارضيه وكان ديكتاتور من الدرجة الأولى ومع ذلك خلد الشعب ذكراه لانه انحاز للفقير.

قرأ المجلس العسكري هذا الشيء بذكاء شديد وبدأ المعركة مبكرا جدا واستخدم كل الوسائل الممكنة لمحاولة اظهار الثورة في شكل ثورة الحريات السياسية وتناسى تماما الجانب الاقتصادي في الموضوع و الفق في الثورة والثوار تهمة سوء الاحوال الاقتصادية التي يتحمل مسؤليتها نظام اقتصادي عالمي ومحلي ينحاز للاغنياء وأصحاب رأس المال وساعد المجلس على ذلك الثوار البرجوازيين, ليس ذلك فقط بل اصروا على بناء ذلك الحائط الذي يفصل بين الثورة والسياسة والاقتصاد عن طريق مصطلحات المظاهرات الفئوية وكإن حقوق العمال الاقتصادية هي شيء ثانوي في أهداف الثورة المصرية.

أظن إن الفرصة مازالت موجودة للخروج من هذه الموجة الثورية بانتصار يزلزل النظام ليس المحلي فقط بل العالمي الاقتصادي والاجتماعي والسياسي, هذه الفرصة تكمن في اعادة ربط الثورة بالاقتصاد بشكل واضح والآلية موجودة.

الآلية ببساطة هي نقل لفكرة عسكر كاذبون, وعبقرية هذه الفكرة كانت في إنها انتقلت من مكان لمكان دون حتى معرفة أصل الفكرة أو أول مكان لها لكن هذه المرة تكون المواد عن مخالفات اقتصادية واضحة للنظام بالكامل و حديث عن مطالب اقتصادية واجتماعية موحدة لو نجحت هذه الفكرة صدقوني لن يقف أحد بعد الآن في وجه الشعب المصري ككتلة واحدة.

دليلك في محاورة سائق التاكسي عن الثورة

من وجهة نظري أكثر ما نجح فيه مجلس الخزي والعار في الفترة السابقة هو إحباط الثوار وافقادهم الثقة في قدرتهم على كسب الشعب .
خرجت محاولات كتير في الفترة اللي فاتت زي تويت شارع وكاذبون وهكذا, لكن بمنتهى الصراحة أنا شايف إن التركيز كله على الجانب الانساني من عرض انتهاكات العسكر واللي أظن انه معظم الشعب رافضها بس بيضغط على نفسه عشان يتقبلها أملا في الإستقرار (ماعدا طبعا أصحاب المنطق المضلل ودي النسبة الاقل صدقوني) لكن مش شايف أي تركيز على أهداف الثوار, لأ اهدافنا مش حرية سياسية ولا ديمقراطية دي كلها وسائل هدفنا هو في الاصل عيش قبل الحرية أنا في الحديث ده هرد ببساطة كده على شوية اسئلة متكررة بطرق مبسطة جدا وجربتها كتير مع سواقين تاكسي وصدقوني بتنفع جدا فمن الآخِر الأسئلة دي هتمسك من بعد ما تقنع الراجل إن العسكر وحشين وهيبتدي يقول لك بس المظاهرات وحال البلد والأزمة واحنا تعبانين وبتاع 

السؤال الاول: الانفلات الأمني

• وده بالذات اجابته سهلة جدا, بتبدأ بسؤال بسيط حضرتك ساكن فين؟ وبالطبع هيكون ساكن في منطقة شعبية ويكون ردك سريع بانك تسأله بذمتك عمرك حصلت عندكم خناقة قبل الثورة والبوليس جه فيها وبالطبع كأي مواطن شعبي بيفخر بقوة الخناقات في منطقته هيقول لك هو يقدر؟
• تاني حاجة قول له عمرك اتسرق منك حاجة قبل الثورة محفظة أو تليفون والشرطة رجعتها؟
• تالت حاجة اسأله كام مرة في حياتك اتشتمت في لجنة أو خد منك رشوة ومفيش سواق تاكسي محصلش معاه كده
• قول له إنه ببساطة جدا  إننا لم نمتلك يوما أي جهاز شرطة يعني إنت لو عيان عايز تعالج ولا تاخد مسكن لحد ماتموت؟ اللي الثورة عملته مش إنها كسرت الشرطة هي كشفت ضعف الشرطة و كشفت للناس انه الشرطة مبتعملش حاجة غير إنها تهين الشعب  . 

 

السؤال الثاني والاهم الاقتصاد وعجلة الانتاج

• اولا قول له أنت عارف إنه مؤشرات الاقتصاد في عصر مبارك كانت بتزيد حوالي 7 في المية سنويا وده بجد بس كنا بننزل الشارع نلاقي الحاجات أغلى والناس عايشة حياة أصعب ليه ؟ لانه ببساطة المؤشرات دي مالناش دعوة بيها لما يفضل يقول حضرتك احيتياطي النقد ومؤشرات البطيخ ده مش بتاعنا
• الموضوع بالضبط عامل زي لما نكون أرْبع اصحاب واحد فينا معاه مليون جنيه والتلاتة الباقيين كل واحد معاه 50 جنيه السنة اللي بعديها الراجل صاحب المليون جنيه بقى معاه إتنين مليون والباقيين بقى كل واحد فيهم معاه عشرة جنيه في المجمل مؤشرات الاقتصاد زادت لإن الناس الأغنياء اللي في بلدك بيغتنوا بس معظم الشعب بيتبهدل وده بالضبط مؤشرات الاقتصاد من الاخر حاجة ملهاش دعوة بيَّ ولا بيك دي بتاعت ساويرس اغتني وافتقر
• طيب الراجل هيقول لك مثلا أنا كسواق تاكسي لما وسط البلد بيبقى فيه مظاهرة حالي بيقف فانت تقول له يعني مبارك لما قفل التحرير تلات سنين عشان يعمل المترو ماكانش حد اتكلم ليه وقال كده , ده غير إن كل دول العالم فيها مظاهرات و طول العمر وعمر اقتصادهم ماوقف ده كله بسبب المجلس العسكري انه بيرعب الناس من انهم يقربوا من وسط البلد تصدق أنا أحلى وقت بحب فيه وسط البلد وقت الاعتصامات بتبقى فاضية والدنيا فيها زي الفل
•  طب وبتوع السياحة يا بشمهندس, الرد هو تاني بنلف في نفس الحلقة أن احنا مش السبب بالعكس احنا عايزين الاحسن
• آخر حاجة ودي تختم بيها كلامك دايما
• لو أنت عايش في قرية مع راجل عملاق والعملاق ده كل يوم يرميلك لقمة عيش وتاكلها يضربك على قفاك قدامك حل من إتنين يا ترضى باللقمة ياتلف وتستحمل يومين تلاتة من غيرها تحاول تضربه وبعدها هيبقى الأكل كله بتاعك لوحدك وكمان ماحدش هيضربك على قفاك,,, أنا عن نفسي مستعد اموت من الجوع عشان متضربش على قفايا   

 

السؤال أو الفشرة الأكبر: بس أنا كنت في الميدان الفترة دي و كلهم بلطجية وأنا كنت معاهم زمان بس دلوقتي الأشكال وأنا روحت وواحد قال لي تشتري برشامة ودي على الاغلب فشرة واحد فشرها واتنقلت بينهم

• اولا هتقول له هو الفقراء بلطجية؟ هيقول لك يا بيه ما أنا أكيد عارف الفرق بين العيال السو والفقراء ردك هيكون كذا حاجة
• اولا طب أنا شكلي بلطجي وهيكون رده أنا مقلتش كله أنا قلت مجموعة بتندس وسطيكم قول له أنا بقى يا سيدي لو ركبت معاك بعد يومين تلاتة بيات في الميدان هتفتكرني عيل سو ما أنا بايت في الشارع مابالك بواحد هدومه على قدها شوية
• تاني حاجة أنت مابتقيسش الشخص على تاريخه يعني ممكن واحد يكون اسرائيلي لكن لقيته بيرمي نفسه قدام دبابة اسرائيلية عشان يحمي واحد فلسطيني تفتكر أنت ساعتها هتقول ده اسرائيلي؟ أنت بتحسب كل فعل بفعله مش بمين اللي بيعمله فـبصراحة لو أنا شايف بلطجي بيعمل مظاهرة عشان بلده هحترم اللي بيعمله وطبعا هنا هيقول لك وده ايه يفهمه وأكيد حد زقه قول له البلطجي ده ضحية فقر وفيهم كتير بيحسوا بظلم فوق الوصف هو بيسرق ويقتل عشان ياكل مش عشان كيفه القتل ليه متقولش انه لما لقى ناس بتطلبله اللقمة والعيشة المحترمة بقى معاهم
• تالت حاجة أنا هفترض معاك للاخر في في الميدان بلطجية مدسوسين ومحطوطين عشان يخربوا , فالحج بيبقى فيه حرامية هل ده معناه نبطل نحج؟؟؟ هو أنت هتسكت على الظلم عشان الظالم كل ماتتظاهر ضده يقول لك لو ماكانش في بلطجية كنت سمعتكم

سؤال: طب ليه مانصبرش لشهر ستة أو نديهم فرصة أو ندي البرلمان فرصة

• بص ياسيدي هي دي المصيبة الكلام النظري بتاع طب مانديهم فرصة ولو فشلوا نثور تاني طب ماده اللي حصل ولو عملت كده هتبقى مصيبة سودا هيفضل ينيم الموضوع عايز دليل؟ أنا كل شوية واحد من اصحابي الثوار بيترمي في السجن أو يموت لو الناس دي نيتها حسنة تفتكر هيعملوا كده
• تاني حاجة المشكلة كلها انهم بيحاولوا يضحكوا علينا وعليك بيقولوا أهداف الثورة ديمقراطية وحرية, لأ مش ده الهدف لإن الديمقراطية هتفقد معناها لو معاها فقر وجهل, احنا عايزين عيش دي أول كلمة اتقالت في التحرير طيب المجلس العسكري سياساته واضحة جدا الانحياز للاغنياء هو احنا شعب غني؟
• لأ احنا مش اغنيا لكن المجلس مصر على انحيازه ليهم الدليل على ده ايه اولا في حكم محكمة بحد ادنى واقصى للاجور لكن فين تنفيذه يقول لك منين قول له روح شوف كده مرتبات الناس الكبيرة قول له شوف مرتب فاروق العقدة بتاع البنك المركزي ونروح بعيد ليه إنت عارف إن عاطف عبيد اللي دمر اقتصاد مصر بيقبض دلوقتي في اللحظة اللي احنا فيها دي 6 مليون جنيه شهريا المشير نفسه شوف مرتبه كام شهريا
• كل المصانع والشركات اللي قامت فيها اضرابات المجلس بالتعاون مع الاعلام كان مصر يبينها على إنها حاجة وحشة لانه مايهموش يضحي باي حاجة إلا فلوسه ممكن يقتل ملايين من البشر بس فلوسه ماتنقصش قرش فتيجي تبص على كل حتة حصل فيها إضراب السنة اللي فاتت هتلاقي انه مثلا رئيس مجلس الادارة فيها بياخد إتنين ميليون والعمال بياخدوا 400 جنيه ويقول لك مطالب فئوية طب بذمتك ده عدل؟ يا عم مبقولش ياخد قدهم بس ميبقاش الفرق مهول كده وهو اصلا ميقدرش يشتغل من غيرهم لحظة
• طيب يبقى احنا نضغط على أي سلطة تيجي عشان الراجل اللي جي يبقى مضطر ينحاز للفقراء يبقى مضطر ينفذ حكم استرداد عمر أفندي ويزود المرتبات بدل ماهو عمال يقول لك أزود الإستثمارت وتسهيلات للاستثمار يعني يروح للرجل اللي معاه مليارات يقول له أنت معفي من الضرايب 10 سنين وييجي على الغلابة يقول لك معلش البلد مفيهاش فلوس نديكم تسهيلات
• طبعا هيقول لك ماهو الراجل بتاع الإستثمار ده بيعمل فرص عمل, قول له يا بيه ده بالضبط اللي كان بيقولوا الخديوي زمان لما كانوا بيسألوه عن موضوع السخرة في حفر القناه كان بيقول برضه فرص عمل وزفت دي كلها خدع تفتكر في مستثمر من دول بيهتم بالبلد كله مهتم بنفسه, طب ماأنت لو بصيت على بلدنا هتلاقي عندنا ازمة سكنية مش كده؟ لكن مع ذلك هتلاقي ملايين من الوحدات السكنية مقفولة عارف ليه؟ لإن ببساطة المستثمرين دول مايهمهمش غير مكسبهم فكل ماياخدوا حتة أرض بدل مايبنوا عليها شقق تسد الأزمة السكانية بيبنوا شقق فاخرة للاغنياء لأنها هي اللي بتاكلهم عيش ولا ايه؟

انهي كلامك بسؤال قبل ماتنزل:

لو حضرتك ماشي في الشارع وشوفت قطة مكلبشة في الأرض ومش عارف تفاديها هتدوسها؟ هيقول لك لأ دي روح قول له حاول تفكر ايه وصل العسكري الغلبان في الجيش انه يقتل مصريين زيه في الشهر اللي فات أو يسحل أو يضرب بالوحشية اللي كلنا شفناها , الموضوع ببساطة يا سيدي هيوصلك للمجلس العسكري اللي بينفخ في الروح المعنوية للجنود بقاله عشر شهور عشان يكرهوا الثورة والثوار إذا كانوا نجحوا يعملوا كده مع ناس كتير من القاهرة مابالك في العسكري الغلبان, صدقني وثق فيَّ اللي في التحرير هم الصح وأي حد يقول لك غير كده كداب,, اللي في التحرير هم بتوع سلمية واللي لما بيتسابوا لوحدهم بينضفوا أما لما الجيش أو الشرطة بتدخل دايما بتظهر العناصر المندسة والضرب والعنف

هكمل في نوت تانية بعدين بس ارجوك متكلموش باستهزاء أو تحسسوا انه مبيفهمش أو كده هو فعلا بيفهم هو بس الموضوع وصله غلط